Che es il Chalandamarz?
Il Chalandamarz es üna veglia üsaunza da l'Engiadina. La persunificaziun da quista tradiziun es Uorsin. Cun s-chellöz e chaunt vegnan il prüm di da marz s-chatschos l'inviern e sieus melspierts.
Cura ho lö il Chalandamarz?
Il Chalandamarz da La Punt Chamues-ch ho lö als 1. marz. Scha'ls 1. marz crouda sün üna dumengia, alura ho lö il cortegi la sanda aunz. L'aunzmezdi dal di zieva es liber. Per tuot ils scolars primars vela il Chalandamarz scu di da scoula ufficiel ed es perque obligatoric. Ils scolarins da la scoulina paun facultativmaing esser tiers uschè lönch, scu ch'els vöglian. Il cortegi cumainza a las 06.00 sün Plaz a Chamues-ch e düra fin ca. a las 16.00. Marendas e gianter do que per tuots in chesa da scoula.
Che as stu trer aint?
Tuottadi portan las scolaras e'ls scolars blusas blovas e chapütschas cotschnas. Vi da la chapütscha stöglian esser franchedas tschinch rösas da palperi da saida, fattas a la maniera da La Punt. Ils mats portan üna plumpa/s-chella e las mattas üna brunzina. Quellas paun gnir imprastedas dals purs indigens, scha que vain organiso a temp.
Che es il bal da Chalandamarz e cura ho'l lö?
Il bal da Chalandamarz ho lö la prüma dumengia zieva il cortegi. Quista festa vain accumpagneda da musica d'üna band e da sot. Impü vain rapreschanto ün teater dals scolars e da las scolaras. Il bal da Chalandamarz cumainza a las 17.00 e glivra a las 23.00.
