Concept directiv forestel da las vschinaunchas da La Punt Chamues ch e Madulain
Il god es üna part essenziela dal spazi da viver da las vschinaunchas da La Punt Chamues-ch e Madulain scu eir da l'Engiadin'Ota.
Lotiers tuochan ils seguaints böts:
- Il god dess güder a proteger e preserver in möd persistent il spazi da viver da La Punt Chamues-ch e Madulain.
- l god dess accumplir il pü bain pussibel tuot sias funcziuns multifaras, impustüt quella da protecziun.
- l god dess gnir mantgnieu scu spazi da viver natürel ed avair scu elemaint da la cuntredgia ün effet sün l'umaun.
Per ragiundscher quists böts es da promouver e chürer l'ecosistem god in möd constant e cumplessiv.
Las seguaintas imsüras sun eir in avegnir necessarias:
- Zieva cas da dan succeda l'implantaziun necessaria cun spezchas da bös-chs confuormas al lö.
- Integrer terrain incultivo aint il god u tgnair aviert il god per structurer la cuntredgia e per promouver la varieted da las spezchas.
- La cultivaziun necessaria dal god vain fatta e la laina chi resulta vain tratta a nüz (sfrüttamaint).
- Territoris da god cun üna funcziun da protecziun speciela stöglian gnir cultivos pü intensivmaing e, scha necessari, gnir sustgnieus cun repars tecnics.
- Impustüt gods cun üna funcziun da protecziun speciela stöglian gnir protets cunter adöver schmasüro tres la pasculaziun/sulvaschina e'l turissem.
Princips per la gestiun forestela da las vschinaunchas da La Punt Chamues-ch / Madulain:
- La gestiun forestela cumünela fo part da l'administraziun da las vschinaunchas La Punt Chamues-ch e Madulain. Ils uordens da god cumünels defineschan il ram.
- La gestiun forestela cumünela consista dal god cumünel, dals mezs da gestiun (üsaglias, maschinas ed edifizis) e da las forzas da lavur
- Las incumbenzas da la gestiun forestela cumünela as laschan dedür dal dret surordino (ledscha da god chantunela e federela), dal plaun da gestiun e da l'uorden cumünel da god scu eir dal concept directiv forestel da la vschinauncha da La Punt Chamues-ch.
Per accumplir las incumbenzas staun a dispusiziun ils seguaints mezs da gestiun e las seguaintas forzas da lavur:
- ün grü a cabel ed ün tractor forestel per lavuors da strer,
- ün'ufficina/magazin i'l revier forestel, iglüminabel e s-chudabel, cun garascha per tuot ils veiculs e maschinas, tualetta, local da's tratgnair e s-chantschia da süjanter,
- equipamaint d'ufficina minimel ed üsaglias per reparer e mantgnair las egnas maschinas ed üsaglias,
- üsaglias e maschinas da maun per tuot las lavuors chi stöglian gnir fattas,
- ün büro per l'administraziun forestela cun infrastructura adequata e moderna,
- üna cligna scu magazin per laina d'arder, pösts, lattas etc. e scu plazza da lavur per lavuors da trid'ora,
- ün silvicultur scu mneder da gestiun,
- impiegos culla scolaziun necessaria per tuot las lavuors chi haun da gnir fattas,
- accordants, impraisas forestelas, impraisas da transport e da fabrica chi executeschan lavuors tenor bsögn.
La gestiun forestela cumünela pissera cha las seguaintas incumbenzas vegnan realisedas:
- Accumplir las lezchas in connex culla producziun (laina, protecziun, recreaziun, god da pasculer, oters servezzans), in connex culla protecziun da la natüra (bös-chs da pichalains, islas da bos-cha veglia, bos-cha secha, protecziun dals spazis da viver speciels) ed in connex cullas finanzas.
- Cuverner la pü granda part pussibla da las spaisas cun vender laina.
- Impuonder ils mezs da gestiun e las forzas da lavur il pü economicamaing pussibel, eir per gestiuns secundaras, per proprietaris da gods privats e per otras incumbenzas da la vschinauncha. Lo es da metter in quint las prestaziuns da maniera cha las spaisas sajan cuvernedas.
- Collavurer taunt scu pussibel cun forzas da lavur e firmas indigenas.
- Promouver la sgürezza da lavur pels collavuratuors.
- Cumpruver las prestaziuns chi sun gnidas fattas a favur da l'economia publica.
Glista da prestaziuns per l'uffizi forestel cumünel da La Punt Chamues-ch / Madulain
L'uffizi forestel da La Punt / Madulain ho da praster las seguaintas lavuors:
- Exeguir la cultivaziun dal god/god giuven e da la racolta da laina tenor las directivas da la planisaziun forestela.
- Furnir als cliaints laina d'adöver e laina d'arder, premiss cha l'ütilisaziun persistenta da laina permetta quetaunt e cha que saja previs tenor l'uorden da god e'l plaun da gestiun.
- Exeguir l'ütilisaziun sfurzeda, scha que fo sen.
- Funder plantaziuns, scha que dvainta necessari.
- Fer uorden zieva tagls, scha que es forestelmaing indicho, e fer uorden lung las sendas e vias da god, scha que vain giavüscho da la mêr part dals turists e da la populaziun.
- Survaglier e controller tuot ils gods in reguard a protecziun da god, dans da sulvaschina e dans da pas-chüra.
- Elavurer ed actualiser la planisaziun forestela, scha que pertuocha l'incumbenza da la vschinauncha.
- Accumplir tuot las lezchas cha'l Chantun pretenda tenor la ledscha.
- Mantgnair e cumpletter las vias forestelas tenor bsögn.
- Controller e mantgnair tenor bsögn tuot ils repars tecnics cunter lavinas chi appartegnan a la vschinauncha.
- Observer e registrer ils incidaints da lavinas e las datas da naiv. Il silvicultur da revier es commember da la cumischiun da lavinas e prievels da la vschinauncha.
- Fer controllas in reguard al prievel da boudas e crudeda da crappa aint il god e tar ovels ed in valluns scu eir fer las sanaziuns in quist reguard.
- Construir fabricats forestels (repars/access) suot la survagliaunza dal silvicultur circuitel.
- Vender servezzans e prodots scu: - lavuors forestelas per terzs, - laina d'arder, - pösts, lattas, bügls etc.
- Exeguir lavuors na forestelas per la vschinauncha e la societed da turissem tenor incumbenza speciela (alps, serragls per la muaglia, plazza da tir, sendas etc.).
- Exeguir las lavuors administrativas da l'uffizi forestel incl. contabilted forestela.
- Rapporter a la suprastanza cumünela tuot las constataziuns, svilups e resultats importants aint ed intuorn il god.
*Exeguir etc. voul adüna dir: planisaziun, precalculaziun, evtl. permiss da fabrica, preparaziun giuridica, dumanda da subvenziun, evtl. devisaziun, büdschettaziun, preparaziun da las lavuors, execuziun da las lavuors, commerzialisaziun dals prodots, controlla, rendaquint.
Glista d'imsüras per l'uffizi forestel da La Punt Chamues-ch / Madulain:
Imsüras chi pertuochan la producziun:
- Promouver l'agir i'l interess da l'intrapraisa.
- Promouver la qualificaziun e la motivaziun dals lavuraints.
- Fer consequentamaing l'analisa da cuosts e guadagn per mincha lavur.
- Formuler directivas e'l böt da gestiun.
- Tscherner per mincha lavur la güsta metoda da lavur.
- Optimer l'ütilisaziun da las capaciteds dals lavuraints e da las maschinas.
- Minimer il temp da lavur.
Imsüras chi pertuochan il richev da gestiun:
- Trer a nüz la buorsa da laina.
- Quantificher e cumpruver il nüz da la cultivaziun dal god.
- Metter in quint tuot las prestaziuns na forestelas da möd cha las spaisas sajan cuvernedas.
- Musser la valur da las funcziuns dal god.
- Trer a nüz tuot las spüertas da sustegn da la vart dals donatuors da subvenziuns.
- Praster lavur publica/lavur d'infurmaziun davart il cuntgnieu dal concept directiv forestel da las vschinaunchas da La Punt Chamues-ch e Madulain, davart las funcziuns dal god e davart las incumbenzas da l'uffizi forestel.
La Punt Chamues-ch, ils 12 december 1997
Uffizi forestel da revier La Punt Chamues-ch / Madulain: Ralf Fluor
