Infrastructuras

  • Il provedimaint e l'alluntanamaint dessan gnir mantgnieus ed amplifichos in möd radschunaivel.
  • Scha soluziuns regiunelas peran dad esser praticas e favuraivlas, schi sun quellas da preferir a las egnas soluziuns.
  • In generel dessan las singulas ouvras gnir finanziedas da möd cha'ls cuosts sajan cuvernos e tenor il princip dal chaschuneder. Reducziun resp. aboliziun da prestaziuns gratuitas dessan succeder considerand ils effets sociels.
  • Lavur publica cun böts clers sün tuot ils livels.
  • Vias: La vschinauncha resguarda ils interess da tuot ils partecipants al trafic e pissera per ün access adequat pel trafic sün tuot il territori cumünel. La vasta rait da vias es da mantgnair in möd adatto. In zonas da fabrica nouvas dess l'avertüra fundamentela gnir prefinanzieda i'l ram da las pussibilteds finanzielas.
  • Plazzas da parker: Ad es da metter a dispusiziun üna spüerta chi correspuonda als bsögns. Ün sfrüttamaint modero da las plazzas da parker stu gnir examino.
  • Ova: Garanzia dal provedimaint e da la qualited d'ova. Las egnas funtaunas dessan gnir protettas e'l provedimaint d'ova as dess baser inavaunt sün quellas. Per l'ulteriur bsögn d'ova fras-cha dessan funtaunas existentas gnir inchaschedas meglder, inchaschamaints supplementers haun da gnir sclarieus. La qualited d'ova dess constantamaing gnir survaglieda e sgüreda cun imsüras adequatas.
  • Las cundiziuns dal squitsch da l'ova aint illa rait da condots sun differentas. Ellas dessan gnir amegldredas cun imsüras da regulaziun definidas.
  • Ova persa: Per schligerir la sarinera es que, taunt scu pussibel, da lascher sfundrer l'ova da surfatscha na inascreda. Ils resultats dal PGAO (plaun generel d'alluntanamaint d'ova/GEP) − chi stu auncha gnir fat – stöglian gnir realisos.
  • Alluntanamaint d'immundizchas: Las immundizchas dessan gnir alluntanedas tenor il motto "eviter immundizchas, redür immundizchas, recicler". La cumpostaziun dess gnir promovida.
  • Energia: Ütiliser energia in möd economic ed ecologic. Promouver energias alternativas illa procedura da permiss.
  • L'ütilisaziun da la forza idraulica dess eir in avegnir gnir sustgnida e praticheda i'l ram üsito.